✍️ محمد أمير ...

عايز تعرف بيحصل تطوير في حديقة الحيوانات بالجيزة ليه؟ وليه هتقفل سنة؟ هقولك خد معايا التسلسل الزمني ده واحكم بنفسك ..

نبدأ بالحلو ..

• ١٨٧١م بداية العمل على اكبر حديقة حيوانات بالشرق الاوسط في عهد الخديوي اسماعيل بتتضمن حيوانات ونباتات نادرة ومتحف واستراحات.

- ١٨٧٥م الخديوي اسماعيل بيكلف الفنان العالمي "جوستاف ايفل" انه يعمل كوبري جوا حديقة الحيوان، قبل ما يعمل برج ايفل نفسه ب١٢ سنة.

• ١٨٩١م افتتاح عالمي لحديقة على ايد الخديوي توفيق بإسم "جوهرة التاج لحدائق الحيوان في أفريقيا".

- ١٩٤٩م افتتاح الاستراحة الملكية في عهد الملك فاروق الاول، مصنوعة بالكامل من العاج والذهب.

دا الحلو، نيجي للوحش بقا والدخول في حقبة البيروقراطية والفساد والاهمال، والموظفين الباحثين عن اي سبوبة ، وتحول الحديقة الملكية من اكبر حديقة في الشرق الاوسط، لمعتقل جوانتنامو للحيوانات.

- ١٩٨٦م الحكومة بتقرر اغلاق الاستراحة الملكية للابد، لاسباب غير معلومة.

• ١٩٩٣م الحارس بيضرب الفيل الافريقي، الفيل بيقطع السلسلة وبيدوس الحارس، وفي نفس السنة حارس قفص الاسود بيسيب باب القفص مفتوح فا تخرج الاسود وتفترسه.

- ٢٠٠٣م اعلن الاتحاد العالمي لحدائق الحيوان خروج حديقة مصر رسميا من التصنيف العالمي.

• ٢٠٠٤م تخرج مصر نهائيا من الWAZA يعني الاتحاد العالمي لحدائق الحيوانات، في مؤتمر صحفي تسبب في فضيحة وقتها، وده بسبب ان الاتحاد اشار لان المسؤولين في مصر بيتجاهلوا توصيات الاتحاد العالمي..