#قصةفيسطور
#كناريا
في الدور الارضي شباك مميز بتطل منه ديما"ام حسين"
اوعا تسألها عن سنها لانها اصلا متعرفش غير انها شافت الملك فاروق
الخطوط في وشها كأنها سطور لتاريخ اجيال
عايشة لوحدها
لو سألتها عن ولادها بترد بدمعة مستخبية جوة عنيها بتعافر معاها عشان متنزلش تبين ضعفها>>يتبع https://t.co/OLbGRebzvT
الحي كله عارف ام حسين القوية صاحبة محل لعب الاطفال
في رمضان تبيع الفوانيس والزينة وتزين الشارع مجانا بنفسها
قرب راس السنة تلاقي عندها في المحل اجمل شجرة كريسماس ولعب بابا نويل
فين المحل؟فين الزينة والفوانيس؟فين وفين؟
لو سألتها تجاوب بدمعة متحاشة حيشة وراها سرها
رغم كدة الابتسامة>
الابتسامة مش بتفارق وشها
وكلمة الحمدلله وحبيبي وحببتي ترد بيها عاللي رايح وجاي وبيسلم عليها
كل يوم من الشباك تسرح كأنها بتقرا التاريخ
كانوا هنا ولادي بيلعبوا..بيتخانقوا..بيجروا ورا كلاب السكك..بيضحكوا ويقعوا ويقوموا
هنا ابن الجيران كان بيعاكس بنت الجيران
ياما اتنسبط فيك افراح>
ياشارع
فجاة تسرح وتضحك"ههههه كله الا فرح زنوبة عالمعلم خميس
لما جه شافعي حبيبها وطربأ الفرح عالمعازيم والمأذون خد ديله في سنانه وهرب من غير مايكتب الكتاب والبت زنوبة تزغرط"
تبص فوق علي شقة زنوبة تسمع صريخها وضربها لعيالها
تناديها"يابت حرام عليكي بطلي فين شافعي">>
"المحروس جوة ومالوش دعوة بالعيال طول ما معاه السُخام النوبايل التش الجديد"
"يابت اسمه تتش"
"انا عارفة ياختي..والأكادا بيقول انه بيكلم واحد اسمه عم جوجل آل ايه كل مايسأله عن حاجة يجاوبه"
"طب سيبيه في حاله طول ما انتي رابطاه بالسبع عيال مش هايفلت منك هههه"
وضحكتهم الاتنين ترن>>
