"كانت سيارة الشركة تكب الاكل المنتهي صلاحيته في البر، قواطي صلصة وحليب وخياش رز مصنوعة من القطن، نجيها حن وغيرنا من خلق الله وناخذها كلها ما نبقّي منها شي، نفوّح الحليب ونشربه ونطبخ الصلصة والرز.. وخياش القطن نخيط منها ثياب"

#سوالف_الوالدة

"كنا مقيمين شمال الكرعانة، طرشتني امي انا وفلانة صوب الركاب?، وحن بنيّات صغار نلبس ثوبين فوق بعض من البرد، شفنا شي من بعيد كنه طواقي وطلع زبيدي، كل وحدة فصخت ثوبها الثاني وترسته زبيدي، وحن معودين مرينا على بيب البترول عنده حراس، تروعنا منهم وقطينا الفقع وطقينا"

#سوالف_الوالدة

"جانا سنة قحط اهلكت كثير من الحلال، نزلنا على اطراف منطقة الاحساء مابقى معنا الا ٥ معزا?

أمي كانت تغزل وتخيط وتدبغ الجلود عشان تبيع في السوق، وكنا نجمع روث الابل الجاف يستخدم للضو?بدال الحطب، اللي اقدر انقله للسوق ينباع بنص ريال، اللي تقدر تنقله أمي ينباع بريال"

#سوالف_الوالدة https://t.co/rc2OlwaKzJ

"جدي كان يرسل أمي في الشتا مع اللي يتوفر من الجمال? إلى ميناء العقير عشان تنقل الناس وأغراضهم من الفرضة إلى منطقة الاحساء على ظهور الجمال مقابل أجرة، ناس يجون الميناء من البحرين وبلادين أخرى، وكل جمل عليه محملين يشل شخصين ومرات يشل ثلاثة.. كان عمر أمي حول ١٦ سنة"

#سوالف_الوالدة https://t.co/5aTRasJjbq

"كنا نجمع الصوف اللي قده قديم من الملابس وبيوت الشعر ، ننكثه ثم نغزله مره ثانية (اعادة تدوير) ونخليه للاستخدامات الخفيفة اللي مافيها شد وتحمل مثل الفرش و غطاء نوقي به الابل في الشتا، والملابس القطنية المستهلكة نقطعها ونبرمها بيدينا ونسوي منها حبال?"

#سوالف_الوالدة https://t.co/rveFyZnZ60