هي مقاومة الانسولين بتخف ولا خلاص كدة أنا لبست ف الحيط للابد؟؟؟؟

#ثريد طويل اوووي

لا طبعا في شوية تغييرات سهلة وبسيطة بس محتاجة تدخل ف روتين حياتك وتكون نمط جديد لو قدرت تعملها حساسية الانسولين حتزيد

-نوم كويس ونوم ف مواعيد طبيعية ننام بالليل مش الصبح على الاقل 8ساعات، السهر واحد من أسباب مقاومة الانسولين

-أتحركوا زودوا خطواتكم رياضة مش لازم يعني جيم وفلوس كتير في apps كتير وفي قناة ع اليوتيوب إسمها walk at home

الخلايا العضلية الخاملة والنايمة دي لازم تحرق شوية طاقة عشان تاخد مكانها سكر،

الرياضة بتحسن حساسية الانسولين لمدة 24-48 ساعة بعد التمرين على حسب شدته

-نقلل التوتر شوية وطبعا فاهمة إن دي كلمة سهلة وعايمة ف الظروف اللي كل الناس عايشة فيها لكن

خروجات الصحاب والضحك والفصلة معاهم، اتفرجوا على فيلم لطيف، سيبوها على الله، اعملوا meditation كل حد له طريقة إنه يفصل شوية وطبعا النوم والرياضة بيقللوا التوتر

-خسوا ?? إنك تخس 5-7% من وزنك على مدار 6 شهور ده بيقلل خطر الاصابة بالسكر م النوع التاني 54%على مدى ال3 سنين الجايين

-زودوا الالياف"شوفان، بذور كتان، خضار، بقول" لانها بتحافظ على تنوع بكتيريا القولون اللي ليها دور كبير جدا ف حساسية الانسولين

أكل ملون"لا مش الوان صناعية" الخضار والفاكهة متقسمين 5 مجموعات على حسب لونهم لازم كل يوم ناكل 3 الوان ع الاقل عشان تنوع مصادر مضادات الأكسدة والفيتامينز