نهر النيل له رافدان رئيسيان: النيل الأبيض والنيل الأزرق.. النيل الأزرق هو مصدر أكثر من ٨٠ في المئة من مياه النهر، وبيطلع من أثيوبيا اللي مش محتاجة سد علشان احتياجاتها المائية ولكن علشان توليد الكهرباء خصوصا بسبب نمو اقتصادها. المشكلة إن مائة مليون مصري حياتهم معتمدة على النيل.
فيه قاعدة لطيفة بتقول إن كل الدول اللي عندها نهر رئيسي بيكون بالضرورة عندها نظام حكم مركزي، ومن زمن الفراعنة كان التحكم في النهر من اختصاصات الحكم. حتى لو مصر عملت محطات تحلية مياه بحر، حيفضل عشرات الملايين من السكان في الدلتا معتمدين على وجود النيل كمصدر وحيد لحياتهم وزراعتهم.
الجفاف اللي ممكن يحصل لو أثيوبيا قررت ملء خزان السد خلال مدة قصيرة لأن سعة الخزان ٧٤ مليار متر مكعب ودة يساوي حصة مصر والسودان مع بعض السنوية من مياه النيل، ممكن يؤثر على شكل الحياة في مصر للأبد. خطر التلاعب بحصة مصر المائية واللي هي في فقر مائي بالفعل، أكبر تحدي لمصر يمكن تصوره.
المطلب المصري خلال المفاوضات لم يكن التوقف عن بناء السد ولكن الاتفاق على ملء خزان السد على مدى سنوات ومراعاة سنوات الجفاف. أثيوبيا رفضت خصوصا وأنها لا تعترف باتفاقيات تقسيم حصص مياه النيل زي اتفاق ١٩٢٩ لأنه ينتمي إلى الحقبة الاستعمارية. كمان بتتكلم عن أهمية السد في توليد الكهرباء
في المجتمع الدولي فيه مفهوم "مجتمع الدول ذات السيادة" واللي من ضمن القواعد المنظمة له عدم الاعتداء على سيادة الدول وإلا واجهت الدولة المعتدية العزلة وفرضت عليها العقوبات ضمن المظلة الدولية اللي بتوفرها الأمم المتحدة، وقد يصل الأمر إلى حالة الحرب زي حرب تحرير الكويت في ١٩٩١.
