ثريد مهم جدا:

في زمن الكوفيد ما زال السبب الأول للوفاة في العالم يحصد أرواح المصريين و الظاهرة الحديثة انه بقيت تحصل في عمر الاربعينات ويمكن ثلاثينات

تصلب الشرايين التاجية المؤدي للذبحة والجلطة ، أي الأزمة القلبية. العوامل المساعدة خمس + اتنين..

العوامل الخمس الكبرى: السكر والسجاير والدهون والضغط وتاريخ العيلة مع المرض.

وهنضيف عليهم واحد سادس (stress) وواحد سابع (sedentary life):

1- السجاير:

حاططها الأول لأني أعتقد ان ده سبب الظاهرة الحالية . مش محتاج تكبر في السن ولا سكر ولا حاجة. لو بتشرب سجاير بشراهة بقيت عرضة ولو سنك 30 سنة! ليه أنا حاسس انها عامل رئيسي حاليا؟ لأن تدخين السجاير بشراهة زاد جدا مقارنة ب 10 او 20 سنة سابقة فقط.

كانوا بيدرسولنا في الطب ان تعريف المدخن الشره المزمن Chronic heavy smoker هو اللي بيشرب 20 سيجارة (علبة) في اليوم لمدة 20 سنة، واللي بيشرب في جيلي كان تقريبا بيشرب علبة فعلا. انا دلوقتي لما باسال المدخنين بيتكلموا في تلت علب يوميا!!

لو العلاقة خطية ، يبقى بدل 20 سنة ، بعد 6-7 سنين بس من التدخين بقى اسمك chronic heavy smoker وعرضة لجميع الامراض اللي كانت بتظهر غالبا بعد 20 سنة.

من مظاهر هذه الزيادة ان من حوالي 15 سنة كان سرطان الرئة الثالث او الرابع في ترتيب الوفيات من السرطان بعد الثدي/البروستاتا، والقولون.