١-
عايز أقول كلمتين بالعقل للناس اللي بتفكر،
اللي محموق وبيحزق يا ريت يعملي بلوك علشان كلامي هيزعله.
بص يا سيدي الفاضل
رقم مليار جنيه يخض،
طبعاً يخض، ده ألف مليون جنيه،
ومليون واحدة ممكن تغير شكل عيشتك على المستوى الفردي.
٢-
بس على مستوى دولة عدد سكانها ١٠٠ مليون، المليار ده يعني ١٠ جنيه على المستوى الفردي.
١٠ جنيه يعني كيس شيبسي،
يعني تذكرة مترو،
يعني ١٠ أرغفة،
يعني معلقة واحدة من طقم الملاعق اللي مامتك حاطاه في النيش،
وما بتعملش أي حاجة بالـ١٢معلقة و١٢شوكة و١٢سكينة و١٢كاس و١٢طبق صغير و١٢كبير
٣-
فلما الدولة تصرف من فلوسك ١٠ جنيه علشان يبقى شكلها محترم قدام وفود أجنبية،
وتديهم إنطباع إن مصر بتتقدم علشان يثقوا فيها ويتعاملوا معاها تجاريا أو يستثمروا فيها،
ويجيلك إنت دخل أضعاف ال١٠ جنيه دي، أرجوك ما تحزقش،
لإن ال١٠ جنيه دي أفيدلك من مئات الجنيهات اللي مرمية في نيش مامتك.
٤-
حقك تقول غلطة أولويات إن الحكومة تصرف ال١٠ جنيه دي في قصور،
حقك جداً تقول كدة،
بس حق ناس تانية تشوف إن مهم جداً إن مصر تدي إنطباع شيك ومتقدم للوفود الأجنبية،
زي ما مصر عملت إفتتاح مبهر لبطولة الأمم الأفريقية،
هل سألت عن تكلفة الإفتتاح ده؟
ليه ما سألتش؟
علشان كنت فخور بيه.
٥-
طبعاً مهم البلد تصرف على رعاية صحية وتعليم وتغذية ومشاريع.
وده بيحصل، وبيحصل بكثافة مبهرة.
مش مجالي دلوقتي أقولك كام منزل في الأسمرات ومشاريع مشابهة، ولا كام مستشفى ومدرسة ومدينة جديدة ومزرعة. ولا كام واحد إتعالج من ڤيروس سي ولا كام كشف سرطان ثدي،
لو عايز تعرف دور وإعرف بنفسك.
