انهاردة سافرت المنيا، سمالوط، مع فريق من "المؤتمر الدائم للمرأة العاملة" (ده برنامج من برامج دار الخدمات مخصص لقضايا عمل المرأة) عشان نجمع شهادات بنات وستات شغالين في جمع المحاصيل الزراعية "قطاع العمالة غير المنتظمة" وسمعنا قصص مماثلة لقصص استخدام العبيد اللي بنشوفها في الأفلام⬇️
الأطفال (بنات وأولاد) من سن ١٣ سنة بيشتغلوا في جمع المحاصيل الزراعية من مزارع استثمارية في الصحرا
الشغل ممكن يوصل ل١٣ ساعة في اليوم و بيكسب بحد أقصى ٦٠ جنيه في اليوم (بيتخصم يومين في الشهر بدل نقل)
بدون وجود مصدر مياه أو أكل أو حمام، بدون حق في أى أجازات أو تأمين ضد أى مخاطر
التحرش الجنسي أثناء النقل أو في مكان جمع المحصول أمر مستمر
المياه الموجودة في أماكن المحاصيل غير صالحة للشرب، لكن مفيش غيرها وبتسبب لهم أمراض كلى وأمراض جلدية
الأكل الوحيد المتاح هو الطماطم (المحصول نفسه) ودي بتكون مرشوشة بمبيدات ومفيش مياه لغسلها
⬇️
في حالة حكت أن لماوصلوا للأرض بعد سفر ٣ ساعات ملقوش فيها محصول يتجمع
طلبوا أنهم يرجعوا، المسئولين عن جمع المحصول (سماسرة بياخدوا عمولات من الشركة المستأجرة للأرض مقابل توريد انفار جمع المحصول) رفضوا يرجعوهم بالميكروباص وسابوهم يمشوا ٣ ساعات في الصحرا عشان يوصلوا للطريق
بنت تانية حكت أنهم فوجئوا بوجود تعبان في مكان جمع المحصول ولما صرخوا وجريوا (عشان مش معاهم أى أدوات حماية أو حاجة ممكن تستخدم في قتل التعبان) سمسار الأرض قال لهم مانا عارف من الأول أن هنا فيه تعبان
