#ماذايحدثللعالم

إقرأ للنهاية لكي تستمتع بالقصة كاملة في 5 دقائق وتعرف من هو المخرج ومن البطل ومن الكومبارس

نحاول مع بعض نبسط الأمور قدر المستطاع ونستخدم أدوات وامثله مبسطه للوصول للمراد.. عشان كلامنا يقدر يفهمه كل الناس.

أكيد كلنا شاهدنا فيلم (سلام ياصاحبي).الكينج

كان مسيطر على جميع الأسواق... ولما سمع إن مرزوق عمل الجولاشة مع الرجاله بتاعته.بعتله عشان يشتغل تحت إيده.. ناس كتير حذروا مرزوق من الشغل مع الكينج لإنه غدار.. لكن مرزوق كان له نظره تانيه. كان عاوز يشتغل مع الكينج ويدخل تحت جناحه ويعرف كل حاجه عنه.. لحد ما تجيله الفرصه ويوقعه

الناس كان عندهم حق في تحذيرهم لمرزوق..وبالفعل الكينج قتل صاحبه بركات يوم فرحه... لكن على المدى الطويل مرزوق أخد كل حاجه من الكينج.وسيطر على السوق وانتصر الخير على الشر..!

☆كل الناس كان بتكره الكينج ورجالته. لكن كانوا مضطرين يشتغلوا معاهم.لأنهم مسيطرين على كل شيء.لكن لما مرزوق

قص الشريط وضرب في الباشا ورجالته... الناس كلها فاقت ووقفت ضده في السوق..لدرجة إن السكرتيره بتاعة الكنج نفسها اتضح إنها كانت شغاله مع مرزوق عشان بتكره الكينج.

سيبك من مرزوق والكينج بقى دلوقتي.وجاوبني على السؤال ده:

لما تكون بتلعب كوتشينه.امتى تحرق الكومي.يعني

امتى ترمي الكومي على الأرض من غير ما تاخد بيه مكسب..

أكيد ده يحصل لما يكون معاك الولد.

بمعنى انك توهم خصمك إنك حرقت الكومي من غير ما تاخد بالك.. فيلعب معاك على أساس إن مش معاك ورق مهم غيره..ثم يفاجئ بحضرتك بتنزل بالولد وتقش الورق كله بعد ما يكون اطمن ورمى كل أوراقه.