من وقت اغتيال الحج قاسم، والرفاق عنا محمسين وبدن ايران تفتح حرب عالاميركي، وبكل معركة بتصير بالمنطقة بصيرو الشباب يسألوا عن الدور الايراني وليش ما عم يحرك صواريخه وما شاكل. عمليا اغبى قرار ممكن الايراني يعمله هوي انو يشارك بجولة مع الاميركي لمجرد الضرب والاستهداف??

ايران اليوم تعتبر الممول والحاضن الاساسي لحركات المقاومة بالمنطقة، والاميركي ب اي حرب مع ايران اول شي رح يعملوا هوي استهداف المصانع الايرانية وكل المفاصل الاقتصادية الايرانية، ساعتها منقعد كلنا بلا قوة رئيسية نستند عليها اذا ازمت الظروف، وبالدرجة الاولى بلا اكل وتمويل

هلأ ممكن حدا يسأل انو ليش ايران عم تبني هالتسليح وليش عم تراكم كل هالصواريخ والخ. بالدرجة الاولى المنظومة العسكرية الايرانية هيي ردعية ودفاعية، والجيش الايراني والحرس غير قادر على مواجهة مباشرة هجومية مع الاميركي. هوي بيقدر يدافع ويردع فقط لا غير..

لهيك، من هون لتصير المعركة تبع اخراج الاميركي من غرب اسيا، حداش يتوقع ايران تبادر وتهاجم.. وطبعا هي المعركة بحاجة لظروف دولية مؤاتية.. هيدا الحكي كرمال حداش يعلي سقف التوقعات، وكرمال نعرف موازين القوة في المنطقة

طبعا في سبب انو سقف التوقعات مرتفع عند الناس، هوي تصريحات المسؤولين الايرانيين، هي القصة لازم يلتقالها حل. اني بفهم ليش الايراني بيالغ بتصريحاتو، في شي موجه للداخل الايراني، وفي شي مرتبط بالاستراتيجية الدفاعية الايرانية اللي احد بنودها هو اظهار العدوانية وما شاكل…