أغلب مشاهد المقاومة الفلسطينية بطولة، مفيش أي تكافؤ، حجارة قدام دبابة، سكين قدام آلي، صدر عاري قصاد حشود مدججة بالسلاح، محاصرين أرض وبحر وجو، من الجار والاحتلال، وأغلب الصور والفيديوهات يتجلى فيها شعر تميم
"يبدون للموت أنه عبث حتى لقد كاد الموت ينخدع"
يتعرض عليهم شيكات بملايين عشان يخرجوا من بيوتهم، لو فدائي نفذ عملية الاحتلال يجبرهم يهدوا بيتهم بأنفسهم، وبيجمعوا يومها فلوس البناء من جديد، عدوك قدام عينك، مضايقات ما بتخلصش، حصار طبي وغذائي، أطفال شهداء اتحفظ جثامينهم في ثلاجات آيس كريم عشان مفيش أسمنت للمقابر، وبيقاوموا
محروم تروح أغلب مناطق بلدك، عدوك سرق بيتك وأكلك وأرضك، مقدساتك -مسلم ومسيحي- تحت سلاحهم، تفتيش مهين في الطالعة والنازلة، تنسيق أمني من شوية خنازير، جيران مشاركين في حصارك، شوية مهابيل بيقولك "أصل المجتمع الدولي"، إعلام أعمى على جرائم عدوك، ويقول على حجارتك اعتداء، وبيقاوموا!
قناصة تضرب أطفال ع الشاطىء، منع لطواقم طبية، قتل بدم بارد وتصفية من نقطة الصفر، مجازر جماعية، تهجير تحت قوة السلاح، سلطة قذرة بتحاكم الشباب على رفع السلاح في وش الاحتلال، أنظمة بتتسابق تبوس أيادي الصهاينة عشان تنول الرضا وتطمن على كراسيها، وحتى الشجب والإدانة بطلوها، وبيقاوموا!
افتح كده الخريطة، شوفها في الكتب والمراجع ومن الإنترنت، يا سبحان الله، القدس طريقها واحد، بس كل واحد ضرب رصاصة في شعبه ولا عايز يعمل أي حاجة، قالك أصل الطريق للقدس يمر عبر ترعة المريوطية ثم إلى الطريق الدائري، تنزل حلب ومنها لبيروت وصولًا لصفط اللبن، هتلاقي نفسك وصلت باب العامود!
