السلام عليكم يا خوانا...

في حاجات بسيطه بس عاوز اوضحا بالنسبه لي اضراب النواب...

كتير من الناس سالوني لما نزلت خطاب الاضراب كحاله في الواتس اب انو لي مضربين ودا ما وقت اضراب والغريبه انو معظمهم من المجال الطبي سواء اطباء او ممرضين او تقني اشعه او فنيي معمل.. فاذا كان اخوانا

ديل ما عارفين السبب للاضراب فاكيد المواطن العادي ما حيكون عارف..

القصه كالاتي..

انت كطبيب عشان تبقا نائب بتمتحن امتحان صعب ومعقد في مجلس التخصصات الطبيه واغلب الناس ما بتنجح من اول مره...

رسوم الامتحان ده كانت 1000 ج اخر مره ما عارفا زادت او لا..

قصاد الالف ج دي انت ما بدوك

قزازاه مويه.. امتحان طويل وعريض ببدا من الساعه 8 صباحا وبنتهي 4 عصرا وفي تخصصات زي الجراحه بتمتحن في 3 ورقات كل ورقه ساعتين...

متوسط الممتحنيين بكون 4000 كل طبيب بدفع 1000 ج دي 4 مليون ج (4 مليار) بتدخل المجلس كل 6 شهور وزي ما قلت ليكم ما بدوك قزازاه مويه في الامتحان..

نجي لي

مرحله ما بعد الامتحان... يا سقطت وعدت الدوامه دي لحدي ما ربنا يفرجا عليك..

ولا نجحت وبي كده تعتبر نائب اخصائي وتبدا رحله المعاناه..

اذا انت ما عندك وظيفه في الوزاره زي اغلب الاطباء حتستنا التوزيع ولما يطلع حتمشي تدفع مبلغ 10000ج(10 مليون) مقابل التدريب في المستشفيات

والان تم رفع المبلغ الى 20000ج( 20 مليون) سنويا...

مده التدريب في الجراحه مثلا 5 سنوات يعني المجمل 100000ج (100 مليون) بدفعا النائب للمجلس قصاد تدريبو لي مده 5 سنوات لحدي ما يخلص ويبقا اخصائي...

دا كلو ما مشكله في ناس باعو حاجات شخصيه وفي الاتسلف عشان يقدر يدفع الرسوم دي