فيلم اصحاب ولا اعز والبطة البرية.تحليل من الشمخ الجواني لأبو رنّة كبير الألاتيه:

الفيلم استحضار لفكرة مسرحية للكاتب النرويجي هنريك إبسن اسمها البطة البرية ناقش فيها الجحيم اللي ممكن يتسبب فيه عدم قبول الانسان لخطاياه الكبرى اللي اعتبر انها جزء من تكوينه البشري

وان عدم قبوله لاخطاءه هيحوله لمسخ

في المسرحية صراع بين دكتور "ريلينج " الطبيب اللي شايف ان فلسفة الحياة مبنية على اختراع كل شخص منا لكذبة كبيرة في حياته بيستخبى وراها علشان يقدر يكمل حياته و سمى الكذبة دي مجازاً كذبة الحياة أو Saving Lie

و كان دورة في الرواية انه يغذي الأكاذيب دي في اذهان الشخصيات علشان يساعدهم في التغلب على هزايمهم النفسية و انكساراتهم و يخلق لهم سعاده موهومة ،على النقيض من دكتور "ريلينج" كانت الشخصية المحورية التانية شخصية "جريجرز" واللي رمز ليه الكاتب بالكلب الذكي Clever Dog

كانت مهمته في الحياة انه يطارد حقائق البشر و كان متبني فكرة المثالية في كل شيء و إن كل انسان لازم يواجة حقيقته مهما كانت سيئة و إن رصيد الإنسان من خطايا الماضي لازم يدفع تمنه فلا مجال للغفران و لا فرار من العقاب و سمى العقاب ده الجزاء الأخلاقي Moral Fable

كان بمنتهى القسوة بيزيل الاكاذيب من حياة كل الشخصيات و بيواجهم بضعفهم و انكساراتهم..بيدور الصراع بين دكتور " ريلنج " و "جريجرز " طول الرواية كل واحد فيهم بيحاول يثبت للتاني خطأ نظريته..و بعد ما جريجرز نجح انه يواجة كل شخص بكذبة الحياة بتاعته كانت النتيجة إن كل الشخصيات انهارت