#قصةفيسطور
#كناريا
قصة بعنوان"قصة مصرية"
ام مينا ديما راسها مرفوعة
ملامحها فرعونية
الوشم علي دقنها بيقول انها صعيدية
ضمة شفايفها بتداري سنانها اللي كل ام محمد جارتها
اللي الضحكة مش بتفارق وشها
تجيلها كل مرة تسألها نفس السؤال
وتقلد لهجتها من كتر العِشرة https://t.co/AKuBMfW4iN
ام محمد:ألا جوليلي يا أم مينا ياختي
انتي ازاي سنانك لساتهم جامدين إكده ما انخلعوش زي سناني
ام مينا تضحك ضحكتها الهادية وترد:واااه يا ام محمد ياختي عاتبطليش السيرة دي اياك
انتي ناسية انك أكبر مني والا ايييه
ام محمد:لاااااه يا ام مينا ياختي انتي لاكبر مني
ام مينا:لاااااه انتي لاكبر
يبدأ صوتهم يعلا وضحكتهم ترن في البيت
يصحا علي صوتهم رامي ابن مينا اللي عايش مع جدته عشان دراسته في الجامعة
رامي بعلو صوته:انتو مش هتبطلوا خناقة كل يوم الصبح وتصحوني من النوم
يجروا الاتنين تجاه اوضته
من فتحة الباب المتوارب الصغيرة يدخلوا راسهم زي الاطفال ف صوت واحد:انت صحيت يضنايا
رامي:والله انا ما عارف انا ضنا مين فيكم
بلا ضناكم بلا زفت انتو صحيتوني من احلا نومة
ونسي انه ماسك الموبايل ف ايده
والاتنين شافوه وف صوت واحد:ما انت صاحي اهو ياوِلد الوِلد
ام مينا:جوم وسيب المدعوج ده من يدك
انهااااردة اولت الشهر
رامي:عارف عارف هاتوا الفلوس وأمري لله
رامي يكمل:انا بس عشان بحبكم مستحملكم
أخد من كل واحدة فلوس وطلع جري عالسلم لام اسماعيل:الظرف ده لجدتك وام محمد ظرفها الشهر الجاي
نزل جري عالسلم وغمز لهم بعنيه..ماهو عارف سرهم
عارف ان جدته ناوية تدفع عربون مكنة الخياطة لام محمد اللي مش متعلمة بس شاطرة في الخياطة
