ثريد بعنوان: حادثي اللي غيّر حياتي.

قبل كم سنة وفي ليلة من الليالي المعتادة اللي الكل يحب يقضيها مع الأصحاب قررنا نطلع كأي قروب شباب وبما اننا كلنا كنا عايشين بفضاوة مريبة، في نفس اليوم المغرب وقبل ما نطلع حسيت بشعور غرييب ما عرفت أفسره إلا بصورة نزلتها بانستقرامي مكتوب عليها:

"التمس لي ألف عذر ولملمني في دعائك حينما لا تراني على الحال الذي اعتدتني عليه"

طلعنا كلنا بسيارة وحدة ووقتها كنت حاس بضيق بشكل مؤلم وكنت أحاول أتجاهله واعيش اللحظة مع أصحابي، وكعادتنا إذا الوقت تأخر نقرر نرجع لبيوتنا إلا ذاك اليوم، اقترح واحد منهم نكمل السهرة بحديقة ..

طبعًا محد اعترض وقلنا يلا، وفي شارع من الشوارع اللي كنا نمشي فيها اتخذ السواق قرار خاطئ بالتجاوز من اليمين، طبعًا انا كنت جمب السواق واول ما طلع يمين كان في شاحنة تمشي بهدوء واحنا على سرعة كبيرة، لحظتها اذكر اني شهقت وسحبت جسمي لورا احاول اهرب بس لا مهرب من القدر ..

آخر حاجة شفتها كانت الشاحنة وطبعًا الفترة كانت ثواني قليلة من التجاوز لين دخلنا تحت الشاحنة، لحظتها انطفيت بشكل غريب وحسيت بشعور الموت، كنت فاقد الوعي بس بنفس الوقت كنت احس اني مت وخلاص انتهى كل شيء، بعد الحادث بدقيقتين تقريبًا صحيت ٥ ثواني بس ..

وكانت أصعب وأغرب ٥ ثواني بحياتي، فتحت عيوني بشكل بسيط ووجهي كامل احس فيه متكسر ومتهشم وكلي دم وقزاز السيارة علي والشاحنة فوق راسي والسيارة ترش مويه من كل مكان والبوري معلق ومزعج وأغمى علي من جديد ..