يا جماعة.. لا نصير مجحفين في تقييم المطاعم والكافيهات.
ترى التقييمات في قوقل ماب وفور سكوير وغيرها، تأثر على رزق صاحب المكان ورزق الموظفين اللي شغالين معه.
إذا ما أعجبك شي معين، لا تخفس به الارض.
قيّم بإنصاف.
الهدف من التقييم توعية الناس بالخدمة وتشجيع المحل على تطوير الخدمة. https://t.co/KfRBWcoSZd
لنفترض ان الخدمة كانت بطيئة !
ما يصير تعطيه نجمة وتنسف كل محاسن المكان عشان شي واحد !
خذ هذا مثلاً مقترح للتقييم:
⁃ نجمة لجودة الاكل
⁃ نجمة لجودة المكان
⁃ نجمة لجودة وسرعة الخدمة
⁃ نجمة لتناسب الأسعار مع طبيعة الخدمة
⁃ نجمة لأي شيء آخر
مطعم كان تعامل موظفينه جاف وسيئ؟!
عطهم ٤ نجمات من ٥ ما يخالف
مكانهم برضه ما كان نظيف؟!
يصيرون ٣ من ٥
فوق هذا كله الطلب وصل متأخر؟!
يصير ٢ من ٥
الطبخ كان سيئ ؟
هنا تعطيهم ١ من ٥
ظلم من ملاحظة وحده بس تعطيه ١ من ٥ !
ما أملك لا مطعم ولا كوفي.. لكن لي كثير من الأصدقاء والمعارف وأسمع منهم.
ما تتخيلون كمية الإحباط اللي يحسون فيها وهم يشوفون مثل هذي التعليقات اللي كثير منها غير منطقي وتكون سبب في تنفير الزباين.
أما بالنسبة للتقييمات المتعلقة بالأسعار.
من الظلم أنك تدخل وكالة مرسيدس أو بي إم وتقول لهم ليش أسعاركم أعلى من تويوتا ونيسان.. وتعطيهم تقييم سيئ فقط لأن المنتج أعلى من ميزانيتك.
نفس الشي المطاعم، تتفاوت تصنيفات المطاعم ودرجات تقديم الخدمة.
اعرف تصنيف المطعم وبعدها من حقك تقيم.
