ممكن تعتبروا الثريد ده إعلان و قولوا عليا قابضة كمان ?? بس هي تجربة مختلفة . الأسبوع اللي فات زرت مكان مختلف جدا في أسوان وانا من الناس اللي لفت شرق وغرب am not easily impressed وما باشتريش كلام فاضي يعني :-)) المهم المكان ده بين خزان أسوان و السد العالي في جزيرة البيچا

بيطل على معبد فيلة على طول .. الجزيرة فيها قرية نوبية الناحية التانية من المعبد بس ده مش موضوعنا . المكان كان مهجور تماما لأكتر من خمسين سنة فيه بواقي قرية هجرها أهلها لما منسوب المية بقى أعلى والمكان اتملا هيش و كائنات بتعيش حوالين المية ( مش تماسيح بس بتخوف برضه ) لغاية ما

اتنين حلوين اتقابلوا أحمد يحيي اللي بيشتغل على تطوير السياحة الصديقة للبيئة في مصر و طه اللي أهله كانوا من أهل المكان زمان .. و قالوا يلا نعمل حاجة .. كسروا الصخر و رمموا بيه البيوت القديمة و لزقوه بالطين مش بالأسمنت لغاية ما عملوا 15 اوضة صالحين للحياة البسيطة جدا عبارة عن سرير

معمول من جريد النخل عنجريب زي ما بيسموه هناك عليه مرتبة متنجدة قطن زي بتاعة أهالينا زمان مش سوست و فايبر و فيها دولاب صغير و حمام معقول نضيف و functional بس ما فيهاش تكيف .عشان الفريون مؤذي للبيئة بس هم بيشتغلوا على تطوير حل صديق للبيئة بالمية زي التكييف الصحراوي بس من غير بلاستك

سيبكم من الأوض و تعالوا بقى احكي لكم على التفاصيل .. مطعم تقليدي بڤيو مافيش زيه في الدنيا النيل ومعبد ايزيس ! وأكل كأن جدة صاحبك اللي من النوبة عاملاه بإيديها أكلنا چكوط (ملوخية) و مسقعة و طواجن لحمة في برام و مسقعة من برة الدنيا وعيش شمسي و كا جيه (عيش الدوكة) وشربنا جبنة (قهوة)