ثريد: إرشادات لتخزين الطعام وتقليل الخروج من المنزل- لعناية الطبقة الوسطى في مناطق #السودان الحضرية

هذه الإرشادات تهم من يملك مجمد للطعام وامداد كهربائي معقول والموارد المالية الكافية لشراء المواد التموينية.

ما مهم تشتري كل الحاجات الفي القائمة دي- لكن مهم الموازنة والتنويع

الكميات ما لازم تكون خرافية: نصيحتي أقل شي خزنو كمية بتاعت اسبوع وأكبر كمية ستة أسابيع عشان ما تعملو أزمة في السوق

ديسكلايمر تانية: انا ما خبيرة تغذية لكن بحب اطبخ في البيت ونسبة لي اسلوب حياتي الفيهو شغل كتير برة البيت في السنين الفاتت تخزين وتحضير الاكل بي كميات حاجة بعملها من زمان شديد لانو بتوفر لي زمن

الفئة الأولى: مصادر النشويات:

1. دقيق قمح
2. دقيق ذرة
3. دقيق دخن
4. رز
5. بطاطس أو بامبي

• الملحقات: خميرة فورية، مسحوق الخبز baking powder، بيكربونات الصوديوم، جردقة.

دقيق القمح ممكن يتعمل منو عيش، قراصة، فطير

الذرة للعصيدة والكسرة

الدخن للعصيدة