النهاردة بالصدفة نازل اتمشي الساعه ٦ الصبح افصل من المذاكرة ورايح اجيب قهوة من circle k شفت اكتر منظر مرعب ف حياتي حرفياً، بنت سايقه وماشيه ب سرعه غبيه عدتني من ورا وانا عارف ان في مطب قدام، كلته العربيه عامت منها دخلت ف عربية عيلة و كسرت صور مول العرب واتقلبت ف الباركينج تحت

البنت ماتت مفكرتش حتى اني انزل ابص عليها لما وقفت قلبت العربية مرعبه حرفياً، بس كان الامل ف العيله جريت على العربية بتاعتهم، طفلين وامهم والاب، كلو كدمات تقريباً بس مفيش حد مش واعي غير الاب والناس عماله تفعص فيه ومش عارف اعدي ونزلوه من العربية. لا ارادياً زعقت " انا دكتور"

ساعتها كلو بعد، كان معايا علبة first aid جايه مع العربية فتحتها طلعت منها شاش حطيتها عالجرح الي ف دماغه وخليت صاحبي يفضل ماسكها ويغيرها كل ما تجيب اخرها دم، الراجل مفيش وعي لا بيستجيب ليا لما اقرصه ولا عينيه بتتحرك معايا والتنفس واقف. والنبض ف ال carotid artery ف رقبته مش حاسه

مفيش حاجة ف دماغي جت غير اني لازم افتح مجري الهوا و ابدأ CPR لحد ما عربية الاسعاف توصل "الانعاش القلبي الرئوي". وسط عياله والزعيق وال panic الي حواليا قطعت تشيرته بالمفاتيح الي كانت معايا ورجعت دماغه ورا وركبت فوقه وبدأت اضغط ع صدره وانزل على بقه اديله نفسين وابدل انا وصاحبي

بعد دقيقة ونص تقريباً كح واداني اول رد فعل وبدأ يتنفس لوحده حمدت ربنا، ونص دقيقه كمان كانت عربية الاسعاف وصلت وشالوه. وما كان مني غير نمت عالرصيف قدام مول العرب وباصص للسما مش مصدق الي بيحصل وجسمي كله بيترعش وسط دعاوي الناس والسواقين "ربنا يباركلك يا دكتور".