الثريد دا مخصص لشباب الامتياز الجديد عبارة عن نصايح والكتب المطلوبة وهكذا ..

اولا صلاتك قبل اي حاجة

مهما كنت شاطر ف دنيتك فأنت عبد لله ..

الشيطان هيقنعك انك دكتور ومهنة سامية وبتنقذ ارواح وللاسف الشديد دا حال كتير م الدكاترة.

تذكر اول مايسأل عنه العبد يوم القيامةالصلاة..

1-سنة الامتياز سنة لطيفة هتقدر تعمل فيها كل حاجة لو عايز تتعلم وتبقي شاطر هتتعلم ولو عايز تأنتخ وتروق بالك هتروق بس هتندم علي كدا لو عايز تذاكر اجنبي وتمشي في طريق السفر معاك وقتك ،عايز تخطب فدا اجمل وقت عايز تخرج وتلعب فدا أعظم زقت

لكن لكل مقام مقال ولكل حاجة وقتها ..

اتعلم كل حاجة متربطش نفسك بمكان معين حتى لو حابب التخصص متسمعش نصيحة حد يقولك شوف للي حابه واحضر فيه الطب مبيتقسمش ..

مينفعش تكون لازق في جراحة واوضة الغرز ومتعرفش لو جالك طفل ب fits تتعامل ازاي ، الاتنين هيموتو قدام عينيك

مينفعش تلزق للنسا وانت مش عارف تفرق بين GE و زايدة

اتفرج كتير قبل ماتاخد الريسك ومتخجلش تسأل هتلاقي نفسك احيانا ممكن حد يضحك من سؤالك بس هو مش شرط بيضحك سخرية م جهلك لا غالبا م برائتك .. خليك بارد بارد جدا . اسأل ومتخجلش. .نقطة الخجل بالذات درب نفسك ع انك تلغيها خالص عشان تتعلم محدش هيحط المعلومة ف دماغك ولو حصل هتنساها عادي .

العيان انسان زيك زيه هو والريلاتيف ويمكن عند ربنا احسن .. متتتعودش تزعق في عيان ولا ريلاتيف ولا تهين ..

ولو حصل اتعلم تتأسف .. الناس غلابة

وانت اغلب م انك تقف قدام ربنا ع عيان كلمته حتى بنبرة صوت مهينة وهتقف ع دا ..

الناس غلابة ومتعرفش ولو تعرف وقت الازمة المخ بيقف ..