جوزيه بيحكي عن أول ماتش شافه للأهلي في الملعب قبل ما يوقع للنادي في 2001 وكان نهائي كأس مصر ضد غزل المحلة بأنه راح في النوم من كتر الملل وملفتش نظره بعد الجمهور إلا حاجة واحدة بس.. مدافع غزل المحلة رقم 5 وائل جمعة وطلب التعاقد معاه

وائل جمعة المنضم للأهلي من غزل المحلة لعب أول ماتش مع جوزيه ضد مين؟ ريال مدريد ومن وقتها مخرجش من تشكيل الأهلي الأساسي سواء مع جوزيه أو بونفرير أو توني أوليفيرا لحد ما رجع جوزيه تاني في 2004 وبنى فريقه

مفيش مدرب أجنبي اشتغل مع الأهلي وحاورته إلا واختار وائل جمعة من أفضل اللاعبين اللي دربهم في مصر.. مفيش مهاجم أجنبي في سلسلة أجانب منسيون إلا واختاره أصعب مدافع لعب عليه حتى زمايله في الأهلي!

الأسماء كانت بتتغير في دفاع الأهلي ويفضل وائل جمعة ثابت وأساسي وفضل أساسي لحد ما قرر بنفسه يعتزل وهو خارج من ماتش وفي إيده كأس البطولة

كان أساسي في تتويج منتخب مصر بـ3 بطولات كأس أمم رغم إن الأسماء كانت جنبه بتتغير.. لعب ضد دروجبا وإيتو وضيوف وجيان وهنري كمارا وحتى ميسي ولوكا توني وياكوينتا وروني