عايز انقلكم شوية مواقف قد تكون بسيطة لكنها جميلة.. فيه ناس تخليك تشعر بالعجز عشان مش عارف تجاريهم في الشر والمؤامرات.. لكن فيه ناس تشعرك بالعجز لأنك مش قادر تكون إيجابي زيهم! فيه واحد اعرفه معرفة شخصية، بينزل من بيته كل يوم، مخصص ساعتين بالليل من وقته عشان ينزل يجوب الشوارع ..

باحثا عن قطط وكلاب الشوارع المصابين أو مرضى.. بيعرف يلاقيهم وبياخدهم لدكتور بيطري في ميدان الحجاز، والدكتور بيعالجهم ببلاش.. لكن لو تعرفوا ان الشخص ده ما عندوش عربية، كل إنتقالاته بالمواصلات وحتى وهو بينقل الحيوانات المصابة بينقلهم في تاكسي..

الشخص ده دخله غير مستقر ويمكن تكون الدنيا مزنقة حبتين معاه، لكنه إنسان بكل ما تحمله الكلمة من معنى! شخص تاني بيعمل نفس الموضوع مع المشردين.. بس مش بيعالجهم، لكن بينزل يتكلم معاهم ويشرب معاهم شاي، متصاحب عليهم وبيشتريلهم بطاطين في الشتا، وساعات اكل او لبس..

بيقولي : انا مش وظيفتي انقذهم، لكن إحساسهم اني موجود ومهتم بيخليهم يشعروا انهم عايشين.. فيه ناس تانيين بيحاولوا يساعدوهم بفلوس، لكن انا باصاحبهم .. وواحدة تانية اتكلمت عنها قبل كده، متخصصة في توزيع الاكل على الحيوانات الضالة في الشارع، بتعمل الشغلانة دي بقالها فترة

كل يوم تاخد بنتها الصغيرة معها في العربية وتساعدها في التوزيع في شوارع مصر الجديدة، الساعة ٦ الصبح قبل المدارس والأشغال! وفيه ناس بيروحوا مستشفيات الغلابة ويتعرفوا على المرضى ويحاولوا يساعدوهم وبيزوروهم بعد ما يطلعوا من المستشفى ويجيبولهم أدوية ويفضلوا على اتصال بهم