المصريين ما نزلوش الشارع في 30 يونيو مع الجيش ولا ضد الدين ! المصريين نزلوا عشان هويتهم اللي حسوا إنها مهددة .. في 30 يونيو اللي مع و اللي ضد يناير كان في الشارع ضد الإخوان رغم إن مؤشرات استفتاء مارس كانت بتقول إن الشارع المصري إسلامي الهوى ..بس اللي ما قراهوش البهايم اللي مسكوا

الحكم في السنة اللي قبل يونيو إن المصريين في المجمل عندهم نسخة دينية خاصة بيهم جدا ! ما بيحبوش حد يقرفهم و لا حد يفرض عليهم حاجة مش شبههم عشان كدة سنين و سنين من تغيير شكل المجتمع بأمثال عمرو خالد و اللي شبهه هدوها في أقل من سنة لما تخيلوا إنهم ملكوا أهل مصر كلها رغم اختلافهم

النسخة المصرية من الإسلام في الشارع أقرب للصوفية ! هي نسخة بسيطة مش مكلكعة بتحب آل البيت و بتتبارك بالأوليا بتستمتع بتواشيح النقشبندي و اغاني أم كلثوم و بتستمخ بصوت الشيخ رفعت في الأدان حتى لما بناتهم غطوا شعرهم في الكام سنة الأخيرة معظمهم حاولوا يفضل شكلهم حلو في حدود امكانياتهم

بيصوموا في رمضان بس بينزلوا يهلسوا لحد الفجر بيلعبوا طاولة على مشاريبهم في القهوة و ما بيجيش في بالهم حتى إن ممكن حد يقول عالضحك قمار ! المصري مش شخص عنيف لاهو ماشي بسلاح زي أهل اليمن ولا بدوي جاف في تعاملاته زي بتوع ليبيا و الجزائر ..المصريين ورثوا دينهم من أهاليهم من غير مناهدة

بيحبوا العدرا و ما يفرقش معاهم ابنها نبي و لا إله و بياكلوا كجك في العيد و مش عايزين حد يقول لهم ده بدعة وبيدقوا هون في السبوع من 3000 سنة و ما عهومش فلوس يدبحوا عقيقة لكل عيل .. المصريين نزلوا يدافعوا عن ده لما حسوا إنه ممكن يتاخد منهم و يبقوا نسخة مشوهة لناس هم ما يعرفهومش