? هعتذر للكل ع إني ممكن هطول شويه ف كتابة شوية حقائق وشرح علمي خاص باللقاحات وده هيكون رد ع كل حد بينشر افكار مناهضه لخطوة التطعيم وتشتيت دماغ الناس ف انهم ياخدوا قرار التطعيم
صحيح ده مش تخصصي لكن هحاول اكتب كل اللي قرأته م مصااادر كتير اوي ويمكن اخدت وقت طويل ولا اخفي عليكم سر
بحثي ف الموضوع ده كان علشان اقدر اخد قرار التطعيم واكون مقتنعه علميا تماما
ف يارب يكون اللي هكتبه حيادي ومحترم
وتقدر تاخد قرارك وانت مرتاح
وأتمني المتخصصين والدكاتره يساعدوني فيما اكتب م خبراتهم ومعلوماتهم اللي اكيد اقوي بكتير م اللي هكتبه
نبدأ ?
معلش قلبل ما نكتب عن اللقاحات نشرح بس جزئيتن صغنطتين هينفعونا ف شرح اللقاحات والاشاعات
اولهم جهاز المناعه
جهازك المناعي اللي عمالين يقولوا لازم تقويه هو جيشك ومهمته حماية جسمك م ان اي كائنات تغزو جسمك كانت بقي فيروسات او بكتيريا طفيليات حتي
جهازك المناعي بيشتغل ازاي
انه بيكون حاجه اسمها (أضداد) او antibodies اللي كلنا بنصرخ عليها حاليا وعاوزينها لفتك فيروس كرونا
طيب (الأضداد ) دي بتتصنع جوه جهازك المناعي للكائنات اللي هتغزوك والكائنات دي بتتسمي (مستضدات)
ولو نسهل اكتر هنشبه الاجسام المضاده اللي بيصنعها جسمك بالمفتاح مثلا والعدو اللي دخلك
هنشبهه بالقفل
يعني جهازك المناعي مطلوب منه يعمل مفتاح لكل قفل يدخله
وطبعا احنا جوه جسمنا ف مفاتيح كتير لاقفال دخلت علينا قبل كده وجهازك المناعي نجح يعملها مفتاح وخفيت م مرضك وده جسمك وجهازك المناعي عمله ونجح فيه خلال عمرك
