لو انت من الناس اللي بتدوخ او بتتعب لما بتركب عربيات او مراكب او طيارات و حابب تعرف ايه اللي بيحصل جواك بالتفصيل و لكن ببساطة و ازاي ممكن نخفف من الموضوع ده تابع الثريد للاخر

يارب اعرف اوصل المعلومة بسهولة و الثريد يفيدكم و يعجبكم ❤️

اولا تعال اخدك في رحلة شيقة نتعرف فيها على اُس المشاكل اللي في حياتك و اللي غالبا هيكون معكنن عليك دلوقتي بما اننا وصلنا لمنتصف الليل

انه ياسادة المخطط للمستقبل و صاحب الاعصاب و الاشارات و المسؤول عن نجاتك حتى هذه اللحظة المُلقب ب ابو الفصوص احب اعرفك على مخك ?

طبعا المخ اعقد بكتير من اني اقوله بالتوصيف اللي جاي ده و لكنه فعلا توصيف بسيط و نفهمه

تقدر تقول ببساطه ان عندنا مخين واحد ممكن تعتبره صاحبك اللي راشق في كل حاجه و عندك التاني الرزل اللي عايز يروح البيت الساعة 8 و عايز ينام بدري و سيب الزفت اللي في ايدك ده

ف تعالو نشوف مين دول

في علاقة مصلحة قديمة اوي بين المخ والجسم

ف المخ محتاج الجسم عشان يعيش و الجسم محتاج المخ عشان يشغله و هذه العلاقة خلت ان في جزء من المخ مُخصص للبقاء وهو ده صديقك الرزل وهو ال Primitive Brain او Reptile brain او من الاخر المخ البدائى

فما هو هذا المخ البدائى الرزل ؟

منذ نشأتنا على الارض و احنا طلعان عينينا هروب من مفترسين و جري و صارع عالبقاء ف الجزء ده من المخ هدفه هو البقاء ايا كانت الوسيلة بقى هو عايزك بتتنفس و تهضم و اعضائك شغاله اوتوماتك و مستحميه و زي الفل بره عنك بقى من غير ما تحس بحاجه هو ميعرفش حاجه غير انه يحافظ عليك "فقط"