كيف تبيع سيارتك .. لا ظالم ولا مظلوم

..

1- تقيم سعر سيارتك بمثيلاتها بمواقع البيع و المعارض ( شف اللي مثل نظافتها ) يعني سيارتك في رش وماشية 500 الف ما تتوقع بتجيب لك زي اللي وكالة وماشية 200 الف

2- صلح كل العيوب البسيطة الاستهلاكية وخل الفواتير معك

العيوب الكبيرة المكلفة تحقق من سعر اصلاحها وقارن بين الورش وحط تقيم وسطي اذا سألك المشتري تعطيه القيمة المقاربة

3- لمع سيارتك ونظفها من الداخل و الخارج .. مو حلوة تعطي احد سيارتك بوسخها

4- افحصها وجدد استمارتها وخلها جاهزة للبيع فورا من حيث هذا السبب يخلي الشخص الصامل يصمل اكثر

5- قم بتصوير سيارتك بالنهار بوقت جميل قبل المغرب او الصبح علشان كل شي يكون واضح امام عين المشتري ويبين جمال السيارة من الامام الخلف الجنب الخلف

6- صور الضربات اللي بالسيارة بالكامل بصور منفصلة عن صور السيارة الاساسية علشان المشتري يعرف وش بياخذ قبل لا يعنيك وتعنيه

7- حاول تحط سيارتك بجميع مواقع البيع الخاصة بالسيارات المستعملة و اكتب كل شي صحيح ( ربي راح يبارك لك في بيعتك ) الممشى و المواصفات و حالة البودي و المحركات

8- وضح للناس انك لاتقبل البدل في حالة ذلك كذلك لن تقبل التقسيط

9- اذا سيارتك من الوكالة على يدك وكامل اغراضها وصيانتها معها وفاتورة الشراء صورها ونزل كل شي هذا الشي يخلي المشتري يحب سلعتك اكثر ويرغب فيها اكثر وتقدر تقله روح للوكالة وتحقق بنفسك من الصيانات

10- اذا سيارتك في صدمه صغيرة وصلحتها نزل الصورة اذا عندك علشان توضح للعميل حجم الحادث