دليلك الذكي في الساحل الشمالي ....
بص بقي يا سيدي ،لو نويت تصيف في الساحل لازم تعرف حدودك كويس و تحدد ميزانيتك حسب مكانك قبل او بعد خط مارينا ٥ لأن ده بيفرق كتير جدا في كل حاجة ،
بداية من الأسماء هتلاحظ انك لو في الضفة الشرقية اللي بتبدأ من العجمي او كرير فإنت كدة مش في الساحل https://t.co/jtpkF6Qtxw
أصلا ولا من حقك تنطق الكلمة دي لانك مرتبط بإسم القرية اللي قاعد فيها واللي غالبا مرتبطة بنقابة معينة او هيئة تدريس جامعة اقليمية و طبعا ا.دسوقي مدير شؤون العاملين اختار لها اسم كئيب زي قرية السراب كنوع من الواقعية او قرية المروة او الهيثم علي اسم ولاده واول فرحته،،،
، والمشكلة انك بتبقي في نص هدومك قدام اصحابك اللي في ديبلو او سيشل وانت قاعد في قرية اسمها جمعية أبناء العاملين في الجهاز القومي للسلطة الخضراء ، ده غير انك لو في الضفة الغربية لازم تختصر اسم الكومباوند زي الدبلوماسيين اللي بقت دبلو، فتخيل كدة لو انت قاعد في مراقيا او البلاح ،،
و حبيت تختصر ??
و مع ذلك القري دي غالبا فيها دفء عائلي وقصص حب بريئة وبيطبخوا كل يوم عادي وبيعملوا ساندوتشات لولادهم في البحر ،خروجاتهم اغلبها بغرض الأكل و البوركيني فيها مكتسح مع القليل من الجلاليب والمايوهات ،
والترفيه مرتبط غالبا بلقمة القاضي و نص محلات فطير الكرة الأرضية،
تقريبا ،ركوب العجل فيها منتشر ومطاعمها بتهتم بنوع الأكل بغض النظر عن طريقة تقديمه يعني مش هتلاقي سوشي و حركات عشان اهلها مفتحين و بيفضلوا الكباب والكفتة والعيش البلدي، مفيش سهرات ماجنة ولا حفلات مولعة و صلاة الجمعة فيها هي الحدث الأهم طول الأسبوع و بعدها كله بيهجم عالبحر ،،،
