ثريد الرحيق والفراش، حول ظاهرة "الكراش"

_

بستمتع جداً بتحليل الظواهر الاجتماعية البتفرض نفسها كجزء أصيل من مقتنياتنا، باعتبار انو بعد منتصف 2017 تقريباً كل واحد بقى بالكراش بتاعو -أو الكراشات- في الثريد ده ح اتكلم عن فكرة الكراش ككل، وأتمنى أضيف لك حاجة في مستقبلك "التكرشي"

فكرة الكراش:

الكراش "crush” كمصطلح استخدم لوصف الشخص المفتون، وانا مكرش في فلان معناها مفتون بيهو، تحور المصطلح لحدي ما بقى بيعبر عن إعجاب شخص بآخر "من طرف واحد ومع الصمت" ... الصمت والطرف الواحد ده يا لصعوبة الوصول أصلاً أو خوف مواجهة

انواع الكراش:

الكراشات أنواع، وبتفكير شوية في الموضوع قدرت أطلع بي 3 أنواع أساسية ... فكل واحد يجيب كراشاتو ويلبسهم مقاساتهم.

١- الكراش المستحيل:

طبعاً ربنا قادر على كل شي لكن في ظل المعطيات الحالية هو مستحيل ده الإعجاب الهوسي البكون بنجوم ومشاهير العالم بكون قايم على قشور ما لها علاقة بالشخصية نفسها لكن بنعوض بيها رغباتنا وأحلامنا، فبكون ظاهرياً بالشخص لكن في عمقه بكون يا بالثروة أو الأناقة، أو المهارة

الإعجاب ده ما بفرق عن إعجابنا بي كابتن ماجد زمان -ما منطقي- وممكن نستفيد منو بي انو نخلي الكرش ده ملهم ومحفز في مجاله المعين

وهنا ممكن نخت "محمد صلاح" "لوسيانا" والجماعة الما ح يسمعو بينا ديل