ازاي تحمي اولادك من الناس المريضة المتحرشة (ثريد)

١- اهم حاجة معامل الشك العالي … الاطفال مَش هتيجي تقولك صراحةً فلان ده عمل كذا او انا متضايق عشان كذا حصل … غالباً هيلمح بس (هيقولك مثلاً عمو ده مابحبوش او غلس او اي تلميح تاني)

معامل الشك العالي انك ماتفوتش الجملة كده ، بالراحة جداً حاول تفهم ابعاد الجملة البسيطة دي

من غير ما تخضه او تزعقله كده بالراحة مع ابتسامة (ليه يا حبيبي ؟) … خليه يتكلم واديله الفرصة كاملة واسأله نفس السؤال كذا مره بطريقة مختلفة … كل مره هيوضح تفاصيل اكتر ، تحللها انت ، وتحاول توصل للصورة كاملة بكل تفاصيلها، يعني انت اللي هتسحب منه المعلومة هو هيتكسف او هيبقي خايف

٢- مفيش حد بعيد عن الشبهات … يعني لو قالك جدو، خالو، عموه، بابا نفسه، السواق، البواب، حارس المدرسة، المدرسيين، اصحابه، اي انسان مهما كانت قدسيته ومكانته ماتخليكش تستبعد عنه الشبهات

=مهما كان العمر (الراجل العجوز اللي ضهره متني وشعره ابيض ، الطفل اللي لسه عنده ٧ سنين)

= مهما كان الشكل (النضيف الارستقراطي والغلبان اللي مَش لاقي ياكل)

ما تنكرش كلامه عشان تفكيرك مَش جايبك لتصور (ازاي راجل عنده ٨٠ سنة يبقي متحرش باطفال!! او ازاي شيخ الجامع اللي بيحفظ قرأن ودروس دين ومثال التقوي يعمل كده!! مستحيل)

ابنك / بنتك صادق وانت اللي محتاج تثبت العكس