جالي ماسچ علي الواتساب وقعتني من الضحك والعياط بعنوان الطبقة المتثبتة والسوبر ماركت وهنقله ليكم هنا ? مسروق طبعا بس اللي كتبه عبقري ?
مشهد في سوبر ماركت - ( بين كاشير و عميلة )?
= كده 4670 جنيه يا فندم
- ده إزاي ؟ ?
= مجرد إستفسار و هتدفعي ولا أزمة فقدان هوية المكانة فى الشريحة الإجتماعية المعتادة ؟?
- لا مانا لو دفعت كده الدنيا هتخرم معايا جامد ?
= تبقي أزمة الهوية المعتادة
- ده إيه ده ؟
= حضرتك بدون أى غلطة إرتكبتيها نزلتي درجة فى الترتيب الهرمي من الطبقة المتوسطة للطبقة الأدني
- أنا مش طبقة فقيرة
= هو مش عيب .. بس عشان خاطر النزاهة هنسميها الطبقة المتشبثة فى الخيط الضعيف الرابط ما بينا و ده النصيب هتخاف عليه هخاف عليه هتسيب هسيب
- نعم ؟
= تلخيصا يعني هنسميها الطبقة المتشبثة
- تمام
= الطبقة دي تستدعي حاليا إننا نعمل مراجعة سريعة للأوردر و تعديله للتناسب مع حالة التشبث اللى حضرتك فيها
- ماشي
= عندك أول خطأ طبقي في أول الفاتورة فوق .. البهارات و التوابل المغلفة في علبة تجعل شكلها يبدو متناسقا علي الرفوف
- إيه الغلط فى التوابل دي حاجة تافهة
= كانت .. إنما حاليا علبة الفلفل الأسمر دي لوحدها ب45 جنيه .. و اللي هي بتوازي نفس الكمية اللى بتقدر بحوالي 7 جنيه من عند أى عطارة .. بس الفرق الوحيد إنه هيديهالك فى كيس شفاف بدل العلبة المتزوقة
- ماشي بسيطة
