بكره جاي 15/1

انا كنت 18 سنه... و هي كانت 16 سنه... مع اننا كل يوم كنا مع بعض في النادي و تقريبا بنعمل كل حاجه مع بعض... يعني كنا بنلعب باسكت سوا... و كروكيه ساعات ضد بعض و ساعات في فريق واحد....و لعبنا تنس سنجل مع بعض... و لعبنا كمان Double Mix في فريق واحد...

بكره جاي 15/2

حتي الكوره كانت بتلعب معايا كوره و كانت بتحب تقف جون و برضه ساعات في نفس الفريق و ساعات في فريق منافس (و كانت بتراهني اني مش هاعرف اجيب فيها اجوان) ... كنا بننزل حمام السباحه مع بعض.. و في أخر اليوم نقعد كلنا الأصحاب مع بعض و كنا هي و انا دايما لازقين في بعض......

بكره جاي 15/3

بس كل ده كان كوم و مشوار التمشيه بتاعنا و انا موصلها بيتها كان كوم تاني. مش عارف ليه يمكن المشي بيولد تناغم او تواصل معين.. و يمكن المشي بيخلق حاله تأمليه خاصه... و يمكن علشان كنا بنبقي لوحدينا..!!! المهم ان مشوار التمشيه ده كان حدوته تدوب القلب و تخلي الروح مرفرفه.

بكره جاي 15/4

كنا بنخرج سوا من النادي علي الساعه 11.30 علشان هي لازم تكون في البيت 12 في الصيف. كنت انا باسيب شنطه النادي علي باب النادي لأني كنت بارجع تاني اسهر مع اصحابي... و كنت باشيل لها شنطنتها. فساتينها كانت واسعه و قصيره و دايما ملونه بألوان ورود وفراشات

بكره جاي 15/5

وكنت دايما باقولها اني نفسي كنت اكون رسمه او نقشه علي كل فستان عندها علشان أكون معاها دايما.كانت خطوتها ضيقه ومشيتها رقيقه كنت باحس ان مشيتها رقصه اكتر منها مشيه وكنت باعرف صوت رجلها علي الأرض و أنا مغمض سواء لابسه كعب لو سهرانين او لابسه Sneakers واحنا في النادي