هشارك معاكوا حاجات إتعلمتها أو شوفتها في ٢٠٢١:

١- كل خير بيحصلك مش بأعمالك، الخير بيحصلك بكرم من ربك

٢- أمك وأبوك، أمك و أبوك، أمك وأبوك

٣- هتقولك مش متفقة مع أمها، وبعد كام سنة جواز هتلاقيها نسخة من أمها

٤- الحسد صفة بغيضة جدا، متخيل واحد عايز اللي عندك و عايز تتحرم منه

٥- ربك مش لازم يستجيب لدعاك، لإنك ممكن تدعي لنفسك بالشر وإنت فاكره خير

٦- مصر دولة خير وطيبة، شعب مصر شعب عظيم

٧- الجواز مرحلة فكرية فيها رغبة وسعادة بتحمل المسؤلية، لو ما وصلتوش للمرحلة دي إوعى تتجوزوا

٨- إوعي الديون، خد بالك من الديون، الديون بتموت، حرفياً بتموت

٩- الدايت هو أعظم فاتح شهية

١٠- هدف الدايت تعيش مبسوط، و الأكل الحلو بيخليك مبسوط برضو

١١- الكلب فيه إنسانية أكتر من بني آدمين كتير

١٢- لما تعمل خير ما تستناش يتردلك، هيتردلك

١٣- روح بوس إيد أمك لو عايشة، أو إدعيلها بالرحمة لو متوفية

١٤- الرفيق قبل الطريق وأهم من الطريق

١٥- فيه ستات ما تتعاشرش، و رجالة كمان

وفيه ستات تفتح نفسك على الدنيا، ورجالة كمان، و بين دول دول ناس كتير

١٦- عملوا تكلفة الجواز كبيرة علشان الإنفصال تبقى خسارته المادية كبيرة، بس ساعات عدم الإنفصال بتبقى خسارته أكبر بكتير.

١٧- تكلفة الجواز كبيرة علشان نختار صح مش علشان نتمنظر

١٨- تحيا مصر بناسها

١٩- إعمل ميزانية وإدي لنفسك مصروف و حوّش، لازم تحوّش

٢٠- فيلم Don’t Look up هدفه يقول إن الجشع هو اللي هيقضي على الإنسانية، عندهم حق

٢١- الستر والصحة يارب، الستر والصحة يارب

٢٢- إصرف فلوسك على اللي إنت محتاجه مش اللي إنت عايزه، إقراها كمان مرة