مافيش دولة ممكن تقدم لك اي شي، ولا حد عارف ايش وضعك فعليا علشان يقلك لا تخرج من بيتك، علشان كذا احتاط قدر استطاعتك والباقي على الله.

خفف الخرجة والدخلة، بالنسبة للقات شوف لك صرفة بحيث تتجنب الازدحام قدر الإمكان، خذ كمية ويبسه مثلا، أو خزن يوم ويوم لا، خلي الشال حقك معك دايما ولفه على وجهك في الشارع، غسل يداتك بالصابون اول ما تدخل البيت، تذكر ان اكثر من نصف الاصابات بدون اعراض او بأعراض خفيفة فلا تفتجع.

لازم تعرف انه ابتداء من اليوم بتتضاعف الشائعات، وكل من خزن بيدخل الواتس يكتب حكاية فلا تفتجع، لو حابب تعرف عدد الاصابات اليومي شوف موقع منظمة الصحة، تذكر انه 99٪ من أخبار مواقع التواصل الاجتماعي والواتس تحديدا كذذذذب.

حاول تهتم بنوعية الاكل هذي الايام(اقسم بالله اكتب ذا الكلام وانا مستحي، في ناس مش لاقية ايش تاكل اصلا)، كثر الفواكة والخضار واي حاجة تعزز مناعة جسمك، لو مدخن حاول تخفف شوية.

اذا قدرت تحتاط حتى 40٪ حلو، كلما قللنا فرص انتشار الفيروس كان أفضل، تذكر ان فرصة الاحتياط المتاحة لك نعمة في ناس كثير مش قادرين يعملوها نتيجة للإضطرار وقلة الحيلة، لو مقتدر مادياً تفقد اهلك وساعدهم في شراء مؤونة علشان تسهل جلوسهم في البيت غير أن رمضان على الابواب