مصريين كتييير ما بيحبوش ، "السبانخ" ليه ؟ لأنكم ما بتعملوهاش بطريقة تفتح النفس ، نفس الصغيرين قبل الكبار ، لو عرفتوا طريقة #ماميتا، لطبخ السبانخ ، حتاكلوها مرة كل اسبوع ، طبعا عارفين ان السبانخ غنية جدا بالحديد ، ايه رأيكم تجربوا طريقتي في عمل السبانخ بس بشرط تقولولي النتيجة

طريقة ماميتا لطهي السبانخ : المقادير

٢كيلو سبانخ ، ربطة شبت، ربطةبقدونس،ربطة كسبرة خضرا ، ٢بصلة ،٤فص ثوم ، ٣ثمرة طماطم ، معلقتين صلصة، سمن او زيت او زبدة حسب طريقتكم في الطهي .،،،

نفرم البصل والثوم او نخرطه او نقطعه حلقات كل واحد حسب طريقة طهيه ، نحملها في "الزيت او الزبدة،،" لغاية ما يصفر ، نكون مجهزين الطماطم مقطعة مكعبات صغيرة بعد اصفرار البصل والثوم نضيف الطماطم و نقلب ، السبانخ تكون متقطعة بحجم كبير شوية معظم الناس بتخرطها صغير ، وتتقطع الي الجزور ،،

وناخد نص الخضرة من كل ربطة "شبت وبقدونس و كسبرة" ونحطها علي السبانخ المقطعة ونغسلهم كويس جدا بالماء اكتر من مرة علشان السبانخ رملية وبيكون فيها رمل كتير، ونقوم بتصفيتها جيدا .

اللي بيحط شوربة او مياه ومرقة ، او مياه فقط حسب طريقة طهيكم يضيفها علي البصل والطماطم علي النار

مع اضافة معلقتين الصلصة والتوابل حسب ما بتحبوا ، غالبا ملح وفلفل فقط، ننتظر حتي غليان المزيج ، وتتم اضافة السبانخ مع الخضرة وتقليبهم في بعض جيدا ، هي ٣ او ٤ دقايق وتستوي وبالهنا والشفا .

ملحوظة لو عندك لحم مفروم بايت في التلاجة ، او قطع لحم مطبوخ ممكن إضافتها ، فقط النوعين دول .