امس ابوي عمل مشكله مع لجنه المسجد اللي هو عضو فيها وسمعهم وبالامام ذاتو وسخ اضنيهم وقال ليهم كلكم منافقين وصلاتكم باطله ما واصله راس الجامع دا وامامكم منافق وبتاع رمرمه ذي ولدي

الامام ماكل اي قروش بتجي للجامع دا وكباها في كرشو الذي الشوال دي..

الغريب في الامر انو امام الجامع دا صاحبو شديد بس ابوي ما عندو صحبه ايوا انا اعترف ب ذلك نيابة عنه ،

ابوي لمن يقوم ما بعرفني ولدو فلذة كبده ولو جينا للحقيقه انا شخصيا مع امام الجامع دا ابرتنا ما بتشيل خيطيجن وقبل كدا في رمضان لمن كنا نايمين في الجامع وانا شاكلت الناس الكانوا ببزقو

وقرفونا في حياتنا قام هو اتجرأ وفتح خشمو معاي وعايز يوريني انو هو سيد الجامع دا وبرضو حسب ما انا صايم وجعان ومتجرس سمعتو وقربت افطر بيهو والله وقال لي سأشكوك الي ابيك ولي معه حديث اخر قلت ليهو اشتكيني للامم المتحده ذاتها

المهم ابوي بعد ردح للمصلين ولجنة المسجد قال ليهم الجامع دا اصلا حقنا نحنا وبنيناهو بقروشنا برانا يلا اطلعوا برا من جامعنا وفعلاً قفل الجامع وشال مفاتيحو خلي الناس تصلي في المظله برا المهم المغرب كدا جوني في البيت لجنة المسجد كلهم ب الامام بتاعهم

وقالو لي بما انك اكبر واحد في اخوانك ف نحنا جينا نشكي ليك والدك وتصرفو الاتصرفو معانا في المسجد

اتخيل يا انسان الناس ديل جايين يشكوا لي ابوي انا الما طايقني اصلا ولا هاضمني ولا عندو ادني رغبه يشوف وشي دا ؟

سبحان الله زمان كان بشكوا الاولاد ل ابواتهم هسي حصل العكس