الناس اللي بيقولوا انهم بيكرهوا السودان ذكروني بقصة حلوة وظريفة كدا للكاتب الشهير باولو كويلو مع ولدو قال ليك أنه في يوم من الأيام كان بيقرأ في الجريدة لكن ولدو الصغير ما خلاهو وكان قاعد يضايق فيه، المهم الأب تعب منو وفكر وقام قطع جزء من الجريدة لقصاصات..
الجزء القطعو دا كان فيه خريطة العالم فطلب منو انه يعيد تجميع الخريطة دي وهو رجع يقرأ الجريده، متخيل انه الحاجه دي حتمسك بيه زمن طويل، ما مرت الا ربع ساعة تقريباً والولد كان مخلص وجمع الخريطة فهو استغرب انه كيف خلص سريع كدا فسألوا انه هل أمك كانت بتعلمك الجغرافيا؟!..
قام رد عليها وقال: لا وانه وراء صورة الخريطة كان في صورة إنسان وعندما أعدت بناء الإنسان، أعدت بناء الخريطة الجملة كانت عفوية لكن في قمة العمق..
"وعندما أعدت بناء الإنسان، أعدت بناء الخريطة"
الشاهد من القصة عزيزي القارئ أنه السودان أو أي بلد في الكرة الأرضية برئيين من كرهك!
والقصة كلها علشان تعيد بناء البلد دي هي مسؤولية الإنسان نفسو هو الحيبني وهو الحيهدم وشوف الدول المتقدمة حتلاقي انه بالجد ماشين بالنهج دا
بس للأسف نحن اولاً ما حكمونا ناس كويسين وكانوا سبب في انه الناس تشوف انه البلد دي ما فيها خير، في حين انه الخير ما كان فيهم هم!
وفي الأخير خليك أنت التغيير ابدأ بيه بنفسك وحتغير نظرتك أو حتكون انسان اقل تشاؤمًا
ربنا يصلح حالنا وحال الأمم كلها ويرفع من شأن السودان..
