النهاردة هنتكلم عن الفيلسوف اليوناني صاحب البرميل ديوجين الكلبي Diogenes the Cynic.. https://t.co/oQSbz1QAKy

أولاً، لقب "الكلبي" ده أطلق عليه لأنه كان من أوائل الفلاسفة اللي نشروا الفلسفة الكلبية Cynicism (الكلمة أصلها يوناني ومعناها "كلب" أو "أشبه بالكلب") ويُقال إن الفلسفة حملت الاسم ده لتفضيلها طبيعة الكلاب على طبيعة الإنسان المتحضر وهنعرف ليه دلوقتي.

أما موضوع "صاحب البرميل" فده لأن ديوجين كان عايش في الشارع جوا برميل زي الحيوانات بالظبط بيأكل وينام ويقضي حاجته مكان ما يحب.

ديوجين كان بيؤمن أن الإنسان أصلاً كائن كويس وابن حلال بس التحضر والقواعد الإجتماعية والسياسية والأخلاقية أفسدته وأبعدته عن طبيعته البسيطة،

وده بالظبط الأساس اللي قامت عليه الفلسفة الكلبية اللي فحواها إن كل ما الإنسان بيتحضر بيفرض على نفسه قيود باسم الحرية والترقي في حين إن القيود دي بتخلق مخاوف جديدة الإنسان مابيعرفش يتعامل معاها وبتعقد مفهوم السعادة\المتعة وبتخليه صعب التحقق.

الكلبية بتقول إن السعي نحو النجاح والسلطة والأموال والعائلة والألقاب الإجتماعية جعل الإنسان ينصرف عن طبيعته ومتطلباتها البسيطة، وبالتالي فالإنسان كل ما يقترب من الطبيعة ويبعد عن القواعد السياسية والإجتماعية اللي فرضتها عليه الحياة الحديثة كل ما بقى سعيد ومبسوط.. زي الكلب بالظبط.