١- بقالي ٤ شهور منزلتش من البيت.. أول مرة أخرج من أوضتي وأطلع البلكونة كانت النهاردة.. البنت اللي ساكنة قصادي طلعت بلكونتها وشافتني قاعد.. إتوترت شوية وقررت أدخل أوضتي تاني.. لقيتها بتقولي "إزيك.. بتحب الشاي؟"، أول مرة أخد بالي منها وعيني تيجي في عينها.. هزيت راسي وقولتلها ااه..
٢- أول مرة أتكلم مع حد من شهور.. قالتلي "ممكن أعملك كوباية شاي معايا؟ أنا بعرف أعمله كويس."، وقبل مقول إجابتي لقيتها راحت تعمله.. بعد كام دقيقة جات ومعاها كوبايتين شاي، وبعد محاولات مستميتة إنها توصلي الكوباية بتاعتي.. عرفت أخدها منها بعد ما إدلق نصها.. قولتلها شكراً.. راحت ضحكت.
٣- قعدت تتكلم معايا في مواضيع عشوائية لدرجة إني حسيت إن الكلام بدأ يتسحب مني وبدأت أتكلم.. قالتلي إنها بتتبسط لما تشوفني وبتحب ملامحي.. إتوترت جداً.. معرفتش أرد.. يدوب إبتسامة خفيفة، وبصيت لعنيها.. كانت مُريحة جداً.. كملِت وقالتلي "أنا حاسة بيك، ومستعدة كل يوم أسمعك وأعملك شاي.."
٤- قولتلها أنا مبعرفش أحكي.. قالتلي "عادي هستناك زي دلوقتي تشاركني سكوتك.. أنا هسيب كوباية الشاي دي عندك عشان أضمن إنك هتطلع تديهالي أعملك الشاي فيها".. ودخلت ، دلوقتي أنا في أوضتي لوحدي.. وهي فاتحة بلكونتها ومشغلة أم كلثوم "وعمري ما أشكي من حُبك .. مهما غرامك لوعني"..
٥- أنا دلوقتي قاعد بسمع معاها أم كلثوم من ورا شباك أوضتي اللي متفتحش من ٤ شهور.. وبفكر إزاي حد شعره حلو وعينيه لطيفة.. يكون مركز معايا ويحب ملامحي، ويكون سبب إني أتكلم كام كلمة متلخبطين، وأبتسم، وأرجع أحس بالأيام حواليا.. وكل ده "بضحكة صغيرة.. وكوباية شاي إدلق نصها عشان توصلي.."
