أنا من المتابعين الدائمين لبرنامج Hot Ones من @firstwefeast، ودايم كنت أشوف ردود أفعال الضيوف على مختلف أنواع الشطة اللي يستعملونها واتساءل "هل هي فعلاً حارة إلى هذي الدرجة؟"

في هالويكند جربت بنفسي حتى أحكم.

للي ما يعرف برنامج Hot Ones، هذا برنامج حواري يقدمه المحاور الذكي Sean Evans، وتعتمد فكرة البرنامج على إنه يسأل ضيفه سؤال أثناء ما هم يجربون ١٠ أجنحة دجاج تم دهنها من الخارج بنوع معين من الشطة. وكل ما زادت حرارة الشطة زاد عمق الأسئلة.

دخلت على موقع @Heatonist وطلبت منهم بوكس أحد مواسم البرنامج، بالإضافة لأنواع أخرى ودي أجربها. وبعد ما وصلني البوكس من امريكا، طلبت لي وينجز واستعملت كيس بلاستيكي لتغطية السطح الخارجي لأجنحة الدجاج بكل نوع من الأنواع اللي وصلت. وبعدها زودت جرعة إضافية حتى اتأكد اني ذقتها صح.

بس قبل ما نتكلم عن التجربة، خلونا نوضح مفهوم مهم لما نتكلم عن اي شي سبايسي. مصدر الحرارة في اي شي سبايسي يجي من مركبات كيميائية نباتية اسمها الـ capsaicinoids وأشهرها الكابسيسين. حتى نقيس حرارة فلفل ما، نقيسه بوحدة قياس اسمها السكوڤيل، وهي ترمز لكم مرة تحتاج انك تخفف مقدار الكابسيسين بالماء حتى يصل لمرحلة لا يمكن تذوقه. مثلاً، فلفل الهالابينيو فيه ٢,٥٠٠ سكوڤيل. يعني تحتاج تخففه ٢,٥٠٠ مرة حتى يمر على حاسة التذوق بدون الإحساس به.

فلما اذكر لك في الثريد تحت ان الشطة الفلانية تساوي ١,٠٠٠ سكوڤيل مثلاً، تعرف بالضبط ايش نقصد.

نكمل تحت

?

شغلت حلقة سيدني سويني اللي كنت رافض أتابعها حتى توصل الشحنة، واستعديت أجرب الوينجز معهم واحدة واحدة.

١- بافالو هوت صوص (١,٨٠٠ سكوڤيل): شطة بافالو عادية لكن بجودة ممتازة.

٢- شطة سموكي جاي من سام ساهاوس (٦,٠٠٠ سكوڤيل): هذي تحتوي على فلفل الهالابينيو المدخن على خشب الكرز مع لمسة أقاڤي وكمّون. طعم الهالابينيو المدخن واضح واحس مكانه بيكون مناسب مع البطاطس المهروسة بجنب ستيك.

٣- شطة ستيلار فز من فنكي (١٩,٠٠٠ سكوڤيل): فلفل هابانيرو والثوم مع خل التفاح ولمسة زنجبيل. طعم الثوم طاغي هنا وأحس ممكن ارجع لها كإضافة على شاورما الدجاج. لا زالت الحرارة تحت السيطرة هنا.

٤- لوس كاليينتيز ڤيردي (٣٦,٠٠٠ سكوڤيل): شطة مكسيكية جداً مصنوعة من التوماتيّو (نوع طماطم مكسيكي يجي لونه اخضر) مع المشمش والكمّون. هنا مذاق مكسيكي بامتياز، وما ناقصها إلا تاكوز كارني أسادا وتكون تجربة رائعة. حارة شوي، لكن لا تزال منطقية.

٥- كيسو سن كيسو من قود هيت (٥٢,٠٠٠ سكوڤيل): شطة غريبة تحاكي طعم الجبن بدون لا يكون فيها جبن، وطعمها مقارب لطعم الجبن اللي يضاف على الناتشوز. هذي ممكن تنقل الفيلي تشيز ستيك إلى مستويات مبهرة.

٦- اضطريت استبدل الشطة اللي في البوكس بشطة أخرى من الموسم الـ ٢٢ واخترت هنا جنجر قوت من تروبيك ستار (١١٠,٠٠٠ سكوڤيل): زنجبيل وعشبة الليمون ومانجو ولمسة يانسون. ما اقدر اذوق شي هنا غير الليمون غراس بشكل مركز وقوي وغير مشهي. بالاضافة لأن الحرارة بدت تكشر عن انيابها، لكن لا تزال محتملة.

٧- فوربيدن فروت من لابيمينتاري (١٢٤,٠٠٠ سكوڤيل): هذي عبارة عن ٦ انواع فلفل حار، وأشدها حرارة فلفل الترينداد سكوربيون، معتقة لعدة اشهر قبل لا يتم تعليبها. هنا بدينا بالضرب تحت الحزام.. اللي قبلها فيه طعم تذوقه وتميزه على الرغم من الحرارة. هنا لا، حرارة وفلفل ولا شيء غير الفلفل. على الاقل لا زالت الحرارة محتملة رغم قوتها.

٨- الشطة الأسوأ في Hot Ones والأكثر إجراماً على الإطلاق، دا بومب (١٣٥,٦٠٠ سكوڤيل): في البرنامج، يستعملون شطة اسمها دا بومب بيوند انسانيتي، ولكن نظراً لتوجه الشركة غيروا عليها وصنعوها بالفلفل نفسه بدون مستخلصات. حرارتها غير منطقية ومؤلمة. السطح العلوي من لساني كأن عليه جمرة، والإحساس ما كان راضي يخف. هذي الشطة الوحيدة اللي أجبرتني اقوم اصب لي كأس لبن. ويبدو لي اني اكتشفت مسارات جديدة في جيوبي الأنفية ما كنت ادري انها موجودة.

٩- شطة سنتا سونوس من تشيلي مونولوكو (٦٨٠,٠٠٠ سكوڤيل): أنا في مرحلة تبلد احساس .. الشطة هذي من كوستاريكا ومستعملين خلطة من أشد أنواع الفلفل حرارة ولكن ما افصحوا عن النسب ما بينها. حارة، ولكن ما هي بنفس تأثير اللي قبلها اللي يبقى عالق في الفم لفترة طويلة.

١٠- شطة The Last Dab من Hot Ones (٢,٦ مليون سكوڤيل ?): الشطة هذي عبارة عن ٩١٪ من Pepper X، واحد من أعتى أنواع الفلفل إجراماً وأشدها حرارة. رفعتها لفمي وأنا اقول "والله ما عادت تفرق".. بعدها، مخي عبارة عن طنين، وكل اللي كنت اسمعه أثناءها "لماذا نحن هنا؟".

التاسعة والعاشرة ما تركوا نفس الأثر المؤلم، لكن اقدر اقول وبكل صراحة ان طعم ٦ / ٧ / ٨ / ٩ / ١٠ ما هو شي ممكن اجربه مرة ثانية او استعمله في أي طبق بدون لا اكون تحت تهديد السلاح.