اول وظيفة في حياتك توك متخرج: خذ قرض و اشتري به ارض لو بآخر مكان في المنطقة اللي انت عايش او مستقر فيها.
5 سنوات تكون تطور وضعك وزانت امورك و تحسن دخلك و سددت القرض الاول: تأخذ قرض جديد + تقطع جزء صغير (ادخار واستثمار) اسأل بنكك.
القرض الثاني تبدأ تبني فيه بيتك (دور واحد)...
اذا قدرت تكمل بناء دور واحد فقط بتصميم بسيط و يكون مأسس دور ثاني فأنت بطل و قطعت شوط كبير جدا في حياتك الاستقرار.
بعد مرور ٥ سنوات تكون بإذن الله امورك تحسنت و قد تكون كملت دراستك او تعدل وضعك بأي طريقة وخلصت قرضك رقم ٢ وتحمعت عندك فلوس ادخار ٥ سنوات.
الحين خذ القرض الثالث..
هذا القرض تقدر تكمل فيه الدور الثاني من البيت أو إذا مكتفي بدور واحد تشتري سيارة و تحسن بيتك من اثاث و أجهزة و أمور أخرى.
هذه ١٥ سنة فقط و قسطك كان طول الوقت ما يتجاوز ثلث راتبك.
بتقول صعبة، أحب أقول لك انها سهلة و السنين تمر بسرعة البرق.
١٥ سنة مرت علينا كأنها أيام.
فيه خيار ثاني و سهل جدا:
اصرف و ضيع فلوسك و سافر كل مكان واتمشى و اشتري لك سيارة آخر موديل و ضيع ١٠ الى ١٥ سنة من حياتك و بعدين تروح تأخذ شقة (جحر ضب) بتمويل عقاري ٢٠ سنة ب ٦٥٪ من راتبك وتقعد في دوامة طول هالمدة و تكره الساعة اللي فكرت فيها تتملك عقار و انتبه تراك مارح تستقر ?
السبب بكل بساطة:
الاختيار الأول كنت تدفع ثلث راتبك و لمدة ٥ سنوات و نسبة أرباح بسيطة جدا و الأرض ملكك انت باسمك ولو ارتفعت قيمتها او بطلت من فكرة البناء او صار اي شيء تقدر تبيعها وتستفيد من قيمتها.
الاختيار الثاني تدفع ثلثين راتبك و عقارك شقة? و مرهونه لمدة ٢٠ سنة.
