ثريد بسيط عن موضوع رفع السودان من قائمة الدول الراعية للارهاب:

الموضوع دا معقد جدا و سبب اساسي للتعقيد انو في مسارين مختلفين لاكن مربوطين بي بعض، واحد في وزارة الخارجية الامريكية و واحد في الكونجرس.

وزارة الخارجية عندها صلاحية انها ترفع السودان من القائمة بي طريقة فردية تقريبا.

حكومة السودان وصلت لي تسوية مع ضحايا تفجيرات السفارات، و كدا بتكون اوفت بي كل الشروط المنصوصة من الوزارة. افتكر عشان كدا بنشوف تصريحات مسؤولين سودانيين بيقولو انو الموضوع حينتهي قريب.

لاكن جزء من الاتفاقية الاتوصلت ليها الحكومة السودانية مع الحكومة الامريكية انو السودان يستعيد الحصانة السيادية، البتمنع انو افراد امريكان يقدرو يرفعو قضية على السودان و دي حاجة فقدناها مع وجودنا في القائمة.

النقطة المهمة انو الصلاحية دي عند الكونجرس و دا سبب اساسي للتعطيل.

في نواب معترضين على استعادة الحصانة لانو في ضحايا 9/11 دايرين يرفعو قضية على السودان.

الخطاب الحايم اليومين ديل هو من نواب تانيين دايرين يتجاوزو الموضوع دا و يدخلو القانون البيساعد السودان مع قانون متعلق بي الصرف الحكومي مفروض يجيزوه الشهر دا.

الكونجرس حياجز بعد الشهر دا و ما حيرجع لحدي شهر واحد، و اذا ما اجازو القانون دا ما بيمنع انو الخارجية ترفع السودان لاكن الوضع ممكن يجوط شوية.

نقطة مهمة تانية انو حتى لو موضوع الحصانة اتحلى، ضحايا 9/11 ممكن يرفعو قضية تحت قانون JASTA اللي حاليا مستخدمنهو عشان يقاضو السعودية.